ABERCASTELL

Meistr Tir

Yr Ymddiriedolaeth Genedlaethol
Rheolir yr Harbwr gan Gymdeithas Perchnogion Llongau Abercastell

Cyfleusterau

• Teleffon Cyhoeddus .
• Maes Parcio ar gyfer nifer fach o geir.
• Llithrfa yn arwain i’r tywod – cerbydau gyriant 4 olwyn yn unig.

Disgrifiad

Hen harbwr masnach yw’r safle hwn, lle'r oedd llechi a chynnyrch amaethyddol yn cael eu hallforio ar un adeg. Mae yma hefyd olion hen odynnau calch yn deillio o orffennol diwydiannol yr ardal. Roedd yr adfail mawr yn storfa rawn ar un adeg.
Nepell i ffwrdd mae Siambr Gladdu Carreg Samson a adeiladwyd dros 5000 o flynyddoedd yn ôl gan lwyth Neolithig a fu’n defnyddio’r lle ar gyfer claddu dros 100 o’u meirwon.
Wrth ymyl yr harbwr mae maes parcio cyfyngedig iawn ar gyfer y safle. Dylid cadw’r llithrfa’n glir ar bob adeg. Yn ôl y cofnodion cynharaf, yma, dros 100 mlynedd yn ôl, y glaniodd y morwr digymorth cyntaf i groesi môr Iwerydd, ar ôl hwylio o America mewn cwch bychan agored.

Gweithgareddau

Pysgota. Mae’r gweithgaredd hwn yn boblogaidd ar hyd yr arfordir. Dylid defnyddio llwybrau sefydledig i gyrraedd mannau pysgota. Pan fydd cyfyngiadau dringo ar waith, gofynnir i bysgotwyr osgoi’r ardal wrth ymyl y creigiau er mwyn peidio ag amharu ar yr adar.
Plymio. Mae parcio’n broblem yn Abercastell, felly ni ellir cymeradwyo’r ardal fel cyrchfan i glybiau neu grwpiau ar ymweliad yn ystod cyfnodau prysur. Gwell cychwyn o Borthgain neu Wdig.
Caiacio. Mae’r harbwr ei hun yn cynnig cyfleoedd padlo diogel, cysgodol a diddorol. Mae cerrynt cryf oddi ar y pentir y tu hwnt i’r harbwr a rhaid dangos cryn dipyn o barch at y rhan hon o’r arfordir fel gweddill yr ardal.
Dringo. Er bod nifer o safleoedd dringo wedi’u cofnodi yn yr ardal, nid oes unrhyw rai o’r rhain wedi dod yn boblogaidd iawn ac mae llawer o’r amddiffyniadau sefydlog a’r belai stanc wedi diflannu. Nid oes unrhyw rai ohonynt yn ymddangos yn addas ar gyfer eu defnyddio gan grwpiau. Mae cyfyngiadau dringo ar Ynys Deullyn ond nid ar Graig Ddu.

Manylion Pwysig

Dylid bod yn ystyriol wrth barcio ceir ac ni ddylid creu unrhyw anawsterau mynediad wrth glwydi a thramwyfeydd.
Mae is-ddeddfau’r Ymddiriedolaeth Genedlaethol yn gymwys ar eu tir hwy i’r gorllewin o Abercastell. Dylid cydymffurfio â’r rhain ar bob adeg.
Mae’r harbwr dan reolaeth Cymdeithas Perchnogion Cychod Abercastell.

Rhifau Cyswllt Defnyddiol

• Yr Ymddiriedolaeth Genedlaethol – 01348 837860
• Parc Cenedlaethol Arfordir Sir Benfro
• Gwylwyr y Glannau, Aberdaugleddau – 01646 690909

TELEFFON CYHOEDDUS YN Y PENTREF