Beth yw’r siarter?

Gallwch fwynhau ystod eang o weithgareddau awyr agored ymhlith cynefinoedd arfordirol a mewndirol Sir Benfro ac mae’r siarter hon yn dangos i chi sut y gallwch fwynhau’r chwaraeon hyn i’r eithaf heb niweidio amgylchedd pwysig yr ardal.

Ffurfiwyd grwp Siartr Awyr Agored Sir Benfro (SAASB) gan ganolfannau gweithgareddau lleol ynghyd â sefydliadau eraill sy’n gweithio ar y cyd gydag Awdurdod Parc Cenedlaethol Arfordir Sir Benfro a’r Ymddiriedolaeth Genedlaethol.

Mae pob un o’r sefydliadau hyn yn pryderu am reolaeth hirdymor yr ardal ac yn awyddus i ddatblygu safonau ymarfer o safon uchel. Maent yn cydnabod y dylai defnydd cynaliadwy fod yn thema allweddol mewn gweithgareddau ac addysg awyr agored

Mae’r rhan fwyaf o Sir Benfro a’r Parc Cenedlaethol mewn dwylo preifat, ac mae’r grwp SAASB yn annog pawb sy’n frwd dros weithgareddau awyr agored i barchu a bod yn ystyriol o drigolion lleol a defnyddwyr eraill yn ogystal ag arfer dinasyddiaeth yn y safleoedd lle cynhelir gweithgareddau ac yn y rhannau hynny o’r sir y byddant yn ymweld â nhw.

Mae’r SAASB hon yn cynrychioli ymrwymiad i arfer da gan yr holl aelodau. Datblygwyd cod ymddygiad gan y grwp sy’n cael ei ddilyn gan yr holl aelodau. Mae pob sefydliad sydd wedi arwyddo’r SAASB yn cytuno fod y canlynol yn hanfodol i weithgareddau awyr agored cynaliadwy yn y sir ac maent yn awyddus i annog pawb i fabwysiadu’r egwyddorion hyn wrth ymweld â Sir Benfro.

MYNEDIAD

Mae pob darn o dir yn eiddo i rywun – os byddwn yn defnyddio safle, byddwn yn gofyn am ganiatâd y perchennog a byddwn yn dilyn cytundebau neu is-ddeddfau lleol.

Byddwn yn ystyriol o’r tirfeddianwyr, y trigolion a defnyddwyr eraill wrth barcio ac wrth osod cyfarpar – e.e. cadw llwybrau, mynedfeydd i ffermydd neu lithrffyrdd yn glir ar bob adeg.

Rhannau penodol yn unig o Sir Benfro sy’n cael eu heffeithio gan weithgareddau awyr agored. Byddwn yn trafod y goblygiadau gydag Awdurdod y Parc Cenedlaethol cyn ymestyn gweithgareddau i safleoedd neu ardaloedd newydd.

Byddwn yn cytuno gyda’r Parc Cenedlaethol ar y ffordd orau i reoli grwpiau ar safleoedd sy’n bod eisoes.

Byddwn yn cadw at hawliau tramwy a llwybrau a ganiateir dros diroedd a byddwn yn dilyn cytundebau lleol. Defnyddir llwybrau troed a llwybr yr arfordir at ddibenion cerddwyr yn unig.

DIOGELWCH A BOD YN YSTYRIOL

Byddwn yn sicrhau fod pob un o’n harweinyddion grwp wedi eu hyfforddi i safonau priodol o dan ganllawiau’r corff llywodraethol perthnasol.

Byddwn yn ceisio gwybodaeth leol sy’n berthnasol i’r gweithgaredd penodol.

Byddwn yn sicrhau nad yw ein gweithgareddau yn amharu nac ar foddhad pobl eraill nac mewn perygl o wneud hynny.

CADWRAETH

Mae nifer o safleoedd, planhigion ac anifeiliaid yn cael eu gwarchod gan y gyfraith ac maent yn fregus neu’n agored i’w niweidio os aflonyddir arnynt. Mae is-ddeddfau yn berthnasol ar dir sy’n eiddo i Barc Cenedlaethol Arfordir Sir Benfro a’r Ymddiriedolaeth Genedlaethol. Ni fyddwn yn codi neu’n dadwreiddio planhigion, byddwn yn osgoi aflonyddwch neu ddifrod a byddwn yn rheoli grwpiau yn unol â hynny.

Byddwn yn annog grwpiau, cydweithwyr a myfyrwyr i barchu a mwynhau cymeriad arbennig Sir Benfro - ei chynefinoedd, bywyd gwyllt, daeareg, archaeoleg ac adeiledd o waith dynion.

Ni fyddwn yn gadael arweddau parhaus mewn ardaloedd gwledig e.e. polion belai neu garneddau. Os bydd elfennau fel hyn yn hanfodol, byddwn yn trafod y mater ymlaen llaw gydag Awdurdod y Parc Cenedlaethol a pherchennog y tir.

Byddwn yn gosod marciau neu sefydlynnau dros dro yn y fath fodd fel eu bod yn osgoi difrod a heb fod yn amharu ar eraill. Ni ddylid defnyddio bolltau dringo ar glogwyni naturiol yn Sir Benfro.

Ni fyddwn yn symud unrhyw enghreifftiau daearegol o’u safle ac eithrio fel samplau unigol fydd yn cael eu codi gan yr arweinydd at ddibenion arddangos.

Ni fyddwn yn symud pethau byw o safle ac eithrio er mwyn eu hadnabod a’u henwi a bydd unrhyw ddefnydd fydd wedi ei symud yn cael ei ddychwelyd i’r un lleoliad

Byddwn, ar bob achlysur, yn gadael safle yn lanach na phan fu i ni gyrraedd yno.

Mae cyfyngiadau penodol ar waith yn achos y Parc Cenedlaethol, yr Ymddiriedolaeth Genedlaethol a Safleoedd o Ddiddordeb Gwyddonol Arbennig (SDGA).

DIGWYDDIADAU ARBENNIG

Byddwn yn dwyn Awdurdod y Parc Cenedlaethol yn ogystal â’r sefydliadau cadwraeth a chymuned eraill i mewn yn gynnar i’r broses gynllunio neu wrth drefnu unrhyw weithgaredd, digwyddiad neu wyl awyr agored.

ADDYSG A DATBLYGU

Yn ogystal â dysgu cleientiaid sut i gynnal gweithgaredd, byddwn yn ceisio meithrin parch tuag at eraill a thuag at arfordir a chefn gwlad Sir Benfro.

Byddwn yn mynychu cyfarfodydd, sesiynau cyfarwyddo ac yn derbyn gwybodaeth oddi wrth Grwp Siartr yr Awyr Agored.

Rydym wedi ymrwymo i adolygu’r Grwp Siarter hwn yn rheolaidd a byddwn yn gweithio ar y cyd gydag Awdurdod y Parc Cenedlaethol ac eraill i wella rheolaeth safleoedd a gweithgareddau.

CYHOEDDIR IS-DDEDDFAU GAN Y CANLYNOL:

Awdurdod y Parc Cenedlaethol – 0845 3457275

Cyngor Sir Penfro – 01437 764551

Yr Ymddiriedolaeth Genedlaethol – 01646 661359

Cyngor Cefn Gwlad Cymru – 01646 624000

Gwarchodfa Natur Môr Sgomer – 01646 636736

Mae Cyngor Cefn Gwlad Cymru yn gyfrifol am ddiogelu Safleoedd o Ddiddordeb Gwyddonol Arbennig ynghyd â rhywogaethau planhigion, anifeiliaid ac adar sy’n cael eu gwarchod.