PENRHYN YSTAGBWLL, ABERLLYDAN, BARAFUNDLE A CHEI YSTAGBWLL

Meistr Tir

Yr Ymddiriedolaeth Genedlaethol.

Cyfleusterau

Meysydd Parcio yn Aberllydan a Chei Ystagbwll. (Codir tâl yn yr Haf, am ddim i aelodau’r Ymddiriedolaeth Genedlaethol).
Teleffon Argyfwng ar ochr y bloc toiledau yn Aberllydan.
Teleffon Cyhoeddus yn y fynedfa i’r bloc toiledau ar Gei Ystagbwll.
Toiledau Cyhoeddus yn y meysydd parcio.
Ystafell De ar Gei Ystagbwll (Ar agor mis Mawrth – Hydref).
Lansio cychod o Gei Ystagbwll (rhaid cael caniatâd Yr Ymddiriedolaeth Genedlaethol).

Disgrifiad

Mae’r safle yn gorwedd oddi mewn i Safle o Ddiddordeb Gwyddonol Arbennig Ystagbwll, Ardal Diogelwch Arbennig ac Ymgeisydd ar gyfer Ardal Gadwraeth Arbennig. Mae rhan o’r ardal yn Warchodfa Natur Genedlaethol. Mae hwn yn safle amrywiol o safbwynt biolegol, ac mae yma ystod eang o gynefinoedd o bwys yn genedlaethol ac yn rhyngwladol. Mae’r clogwyni yn darparu safleoedd nythu ar gyfer nythfeydd pwysig o adar - y Chwilog (Guillemot), Gwalch y Penwaig (Razorbill) a’r Wylan Goes-ddu (Kittiwake) yn ogystal â’r Frân Goes-goch (Chough).
Ymhlith y clogwyni calchfaen carbonifferaidd mae nifer o ogofâu, bwâu, mordyllau ac agennau. Mae’r ardal yn boblogaidd fel man cynnal nifer o weithgareddau awyr agored, a gwneir defnydd da o’r safle gan ddringwyr creigiau, cerddwyr ac eraill sy’n frwd dros yr awyr agored.
Gosodwyd llwybrau dringo ar hyd rhannau helaeth o’r morlin. Nodwch fod cyfyngiadau dringo cytunedig ar rai o’r creigiau. Mae manylion am y rhain i’w gweld ar yr hysbysfyrddau yn y maes parcio ac yn y taflenni ‘Cyfyngiadau Cytunedig ar Ddringo Clogwyni’ sydd ar gael o’r Old World Café yn Bosherston. Mae moeseg ‘dim bolltio’ yn berthnasol i bob morgraig yn yr ardal. Mae ‘garddio’ yn dinistrio cymunedau bregus mewn agennau ac ar ysgafellau a dylid osgoi hyn. Cafodd llwybrau arfordiro eu cytuno i’w defnyddio o amgylch y creigiau. Dylai grwpiau newydd sy’n dymuno defnyddio’r safle gysylltu â’r Ymddiriedolaeth Genedlaethol. Dylid trafod unrhyw lwybrau newydd gyda’r Ymddiriedolaeth Genedlaethol.
Gellir lansio cychod oddi ar Gei Ystagbwll. Gellir gwneud hyn yn unig gyda chaniatâd yr Ymddiriedolaeth Genedlaethol. Dylid nodi fod y safle yn rhan o Ardaloedd Perygl Môr Maes Tanio Castell Martin a Maenorbyr. Cysylltwch â Gwersyll Castell Martin er mwyn sicrhau fod yr ardal yn ddiogel. Dylai’r rhai sy’n defnyddio canwau o Aberllydan fod yn ymwybodol o’r ardal perygl môr.

Manylion Pwysig

Mae is-ddeddfau’r Ymddiriedolaeth Genedlaethol yn gymwys yn yr ardal. Mae’r rhain wedi eu gosod ar hysbysfyrddau yn y mynedfeydd i’r ystâd. .
Dylai ymwelwyr fod yn ymwybodol o’r clogwyni serth a’r ffurfiannau creigiog a’r perygl sydd ynghlwm wrthynt.
Mae’r traeth creigiog yn sensitif; ni ddylid symud samplau o’r ardal (oni fydd caniatâd wedi ei gael ymlaen llaw oddi wrth Yr Ymddiriedolaeth Genedlaethol neu Gyngor Cefn Gwlad Cymru.
Ni chaniateir gwersylla yn yr ardal.
Dylid cadw cwn o dan reolaeth ar bob adeg er mwyn osgoi aflonyddu ar bobl, bywyd gwyllt ac anifeiliaid.
Nid oes hawl seiclo ac eithrio ar ffyrdd a llwybrau ceffyl.
Mae traethau Aberllydan a Barafundle yn cael eu glanhau gan Gyngor Sir Penfro.

Bydd llwybr yr arfordir yn cael ei ailgyfeirio pan fydd tanio yn digwydd ar faes tanio’r Weinyddiaeth Amddiffyn gerllaw. Os bydd y maes tanio i gyd ar gau, bydd y llwybr yn dilyn y ffordd o amgylch y pyllau lili; os bydd rhannau o’r maes tanio ar agor bydd yn dilyn yr arfordir i Gapel Sant Gofan ac yna ar hyd y ffordd i’r mewndir. Bydd Baneri Coch yn chwifio yn ystod amserau tanio.

Rhifau Cyswllt Defnyddiol

Yr Ymddiriedolaeth Genedlaethol – 01348 837860
Parc Cenedlaethol Arfordir Sir Benfro – 01437 764636
Gwylwyr y Glannau, Aberdaugleddau – 01646 690909
Cyngor Cefn Gwlad Cymru - 01437 766646
Gwersyll Castell Martin – Yn ystod Cyfnodau Tanio (Twr) - 01646 662336, Oriau Golau Ddydd (Swyddfa’r Maes Tanio) - 01646 662287, Wedi Oriau (Ystafell Warchod) - 01646 662280
Cyngor Sir Penfro - 01437 764551

TELEFFON ARGYFWNG YM MAES PARCIO ABERLLYDAN
TELEFFON CYHOEDDUS AR GEI YSTAGBWLL